சங்கர் சாரதி இயக்கத்தில், சேத்தன் சீனு மற்றும் ஆஷ்னா ஜாவேரி நடிப்பில் வெளியாகியுள்ள ‘வள்ளுவன்’ திரைப்படம் ஒரு விறுவிறுப்பான க்ரைம்-த்ரில்லர் (Crime-Thriller) திரைப்படமாகும்.
நகரத்தில் அடுத்தடுத்து சில முக்கிய நபர்கள் கொடூரமான முறையில் கொலை செய்யப்படுகிறார்கள். இந்த கொலைகளின் பின்னணியில் இருக்கும் ஒரே மர்மம் என்னவென்றால், கொலை செய்யப்பட்ட ஒவ்வொரு உடலின் மீதும் ஒரு திருக்குறள் எழுதப்பட்டிருக்கிறது. இந்த வழக்கை விசாரிக்கும் காவல்துறை அதிகாரிகள், கொலை செய்யப்பட்டவர்களுக்கும் கடந்த காலத்தில் நடந்த ஒரு கொடூரமான குற்றத்திற்கும் தொடர்பு இருப்பதை கண்டுபிடிக்கிறார்கள். ஒரு கட்டத்தில், இந்த கொலைகளுக்கு காரணமானவர் என்று சந்தேகிக்கப்படும் நபர் கைது செய்யப்பட்டாலும் கொலைகள் தொடர்கின்றன. இதன் பின்னணியில் இருக்கும் சதிவலை என்ன, உண்மையான குற்றவாளி யார், அவருக்கும் திருக்குறளுக்கும் என்ன சம்பந்தம் என்பதே ‘வள்ளுவன்’ படத்தின் மீதிக்கதை.
நாயகனாக நடித்துள்ள சேத்தன் சீனு, ஆக்ஷன் மற்றும் சென்டிமெண்ட் என இரண்டிலும் தனது சிறப்பான பங்களிப்பை வழங்கியுள்ளார். குறிப்பாக உணர்ச்சிகரமான காட்சிகளில் இவரது நடிப்பு மனதைத் தொடுகிறது. ஆஷ்னா ஜாவேரி நீண்ட இடைவெளிக்குப் பிறகு திரையில் தோன்றினாலும், சமூக சேவையில் ஆர்வம் கொண்ட பெண்ணாக நேர்த்தியான நடிப்பை வெளிப்படுத்தியுள்ளார்.
காவல்துறை அதிகாரியாக நடித்திருக்கும் பிரேம்குமார், மற்றும் மனோபாலா, சாய் தீனா, மீசை ராஜேந்திரன், கராத்தே ராஜா உள்ளிட்ட அனைவரும் தங்களுக்குக் கொடுக்கப்பட்ட கதாபாத்திரங்களை குறையின்றி செய்திருக்கிறார்கள்.
அஸ்வத் இசையமைப்பில் பாடல்கள் அனைத்தும் கேட்கும் ரகமாகவும், பின்னணி இசை த்ரில்லர் கதைக்கு ஏற்றவாறும் அமைந்துள்ளது. சுரேஷ் பாலாவின் ஒளிப்பதிவு சென்னை நகரத்தையும் கதாபாத்திரங்களையும் இயல்பாகக் காட்டியுள்ளது. சான் லோகேஷின் படத்தொகுப்பு யூகிக்கக்கூடிய திரைக்கதையாக இருந்தாலும், அதை எதிர்பார்ப்புகளுடன் நகர்த்த உதவியுள்ளது.
பெண்களுக்கு எதிராக அநீதி இழைப்பவர்கள் அதிகாரமும் பணமும் இருந்தால் சட்டத்தின் மூலம் எளிதில் தப்பித்து விடுவதையும், அவர்களுக்கு சட்டத்தை தாண்டிய தண்டனை வழங்கப்பட வேண்டும் என்பதையும் இயக்குனர் சங்கர் சாரதி அழுத்தமாக பதிவு செய்திருக்கிறார்.
